Selasa, 10 Januari 2012

Adat Enggau Pengarap?

Adat enggau pengarap Iban asal? Tauka Adat? Tauka Pengarap nya sama? Nama reti adat? Adat nya Culture, siti utai ti endang peturun ti dibai aki ini kitai suba. Tang nama pengarap nya ? Pengarapnya believe,  iya nya pasal pengawa besembahka petara. Adat Iban asal endang manah sereta ngembuan basa ti tinggi enggau reti ti dalam. Kemayuh anak bala nembiak rebak batu ( dalam umur 20an-30an) enda entu nemu enggau silik senentang Adat enggau Pengarap Iban asal. 


Nama Adat Iban asal? Aku deka magi enggau berapa iti langgur penemu, keterubah Leka Main asal(pantun, ensera,entelah, biau) kedua ukum( ukum orang belaya, ukum orang butang, ukum ngenchuri enggau etc) enggau jalai ngintu pengawa( orang kahwin,orang parai, jalai idup ba rumah panjai enggau etc). Ketiga iyanya Jaku IBAN.  Baka leka main aku mega deka meri runding pasal biau,ba runding aku leka biau iya siti falsafah kitai iban dalam meri langgur peransang penemu. Bala sida lemambang ngembuan runding ti dalam kelebih agi dalam meri jaku ti mai pemujur. Leka buai biau tau diambik kita nya ka sastera tau ka seni, taja ( ngagai sida ti bepengarap Kristian, enggau ke bukai) orang ti bebiau nganggau ka nama petara enggau ngadu ka piring ( offering) nya ukai seni tauka ka dalam bagi sastera agi laban nya mai pengawa besembah ka petara. Ba penemu aku biau nya nadai salah tang enda ngangau ka nama petara, tang lebih nekan ka penggawa bungai biau. Kati deh enti bebiau enggau manuk enggau piring ading? enti bakanya enda ulih disegulaika enggau pengarap Kristian enggau bukai. Laban udah bebida ari jalai nitih betuai ka Tuhan ti siku aja. Laban enda ulih dua perau. Enti ngagai bala iban ti negmbuan pengarap asal nya nadai penanggul. Ambik ke banding biau pengabang nya enda basa ti manah ke ngenatai ka pengabang. Ulih bebiau enggau manuk nadai salah, tang anang nyayat rekung manuknya alu genselanka darah iya ( ngagai org kristian) aduka nya nyadi simbolik aja. Ngagai orang Kristian ti ba rumah panjai kelebih agi, laban kitai Iban ti tuai ba rumah panjai engka kurang dalam macha enggau belajar ke bup kudus, ari nya pengarap baru enggau pengarap Iban nya dikumbai sida adat, bisi bida runding mimit senentangnya. Utai ngasuh kitai teleba salah dalam pengarap nya, pengarap Iban ti lama dikumbai kitai adat, taja kebendar iya adatnya ukai pengawa ti besembah, adatnya lebih ka kaul dalam pengidup besahari-sahari enggau leka main. 


    Ba runding aku, adat Iban nya bepun ari leka jaku Iban empu. Ambik ka banding dalam jaku sempama, dikelala bungai ari langguk, dikelala bansa ari jaku. Jaku Ibannya endang batu pemun adat bansa kitai, bakani kena ngelai nuan nya IBAN? Keterubah ari DNA nuan, kedua ari bangsa budaya nuan, enggau ketiga ari bansa negara nuan. Ba DNA, kitai iban ngembuan DNA kediri empu, setiap iku bansa bisi ngembuan DNA ti nadai ba bansa bukai. Dalam Bansa budaya iyanya dichuraka ari endur pendiau kitai begulai. Ambik ke banding ari Jaku( cara bejaku oral, cara nulis), cara berunding( cara ngaga pemutus),cara ngaga utai ( chara bumai, chara manduk utai, chara ngaga utai ti dikena). Jaku Iban nya pemadu beguna bendar, engka mayuh bala nembiak Iban ke ba Luar negeri enda entu landik bejaku dalam jaku Iban ti dalam kelebih agi ti besangkut paut enggau jaku sempama. Kediatu Jaku Iban enti dipeda ari segi pelajar endang udah datai ba tikas ti pemadu tinggi, ambik ka chunto di UPSI, jaku Iban udah diajar ba peringkat Universiti ngaggai bala sida ti ngambi krusus nyadi pengajar. Bansa negara mega pasal kitai Dayak ( Iban, Bidayu, Orang Ulu) dalam negeri Sarawak. Ambai Kitai Iban enda jauh bida ari bansa asal dalam Sarawak laban ketegal kitai diau segulai dalam Sarawak, Malaysia. Bangsa negara tok digaga ari proses politik, bangsa budaya ari proses ti diadaka ari kitai ibann empu ari setuju penemu enggau atur ti disetuju ka bala mayuh, lalu ka penudi iya bansa DNA nya endang digaga Tuhan empun ( enti ari Sains nya endang bisi dalam tiap iko kitai iban).


   Diatu aku, deka bekenang ka pasal pengarap. Pengarapnya lebih nuju agi ngagai pengawa besembahka Tuhan( Yahweh, Allah, Budhha, Sengalang Burung etc). Nama reti agama? Agamanya pengarap ti ngembuan kitab suci ( Bible, Alquran,etc), lalu agamanya madah ka pengawa ti salah enggau betul ti patut digaga, pasal serga enggau negara, pasal sapa Tuhannya. Tang enti baka pengawa ka besembah ka pun kayu, betuai ka burung nya dikumbai animisme.  Aku deka bekunsi ka pengarap Kristian kelebih agi, ba penantai Rajah Burak suba mayuh bala orang penginjil dianjung. Alu Kristian majak bala ngerembai diserata menua Sarawak. Nemu kita ba Sarawak bisi Gereja ti endang asal ari menua kitai empu? Sidang Injil Borneo nya endang ditumbuhka kitai Dayak empu. Ba Bakalalan, Orang Ulu udah meda kerja nyelai Tuhan empun din. Dia sida lalu ngepun ka gerija ari kitai Borneo empu. Mayuh mega gerija bukai ti datai ari menua bukai baka Angelican, Khatolik, Medthodist , SDA, Baptis, Hope, semua gerija tok ari menua bukai lalu mai berita manah ngagai menua kitai. Ba bagi gerija mega bisi pengelain ba chara sembiang sida, tang bup kudus enda sigi diguna siti aja lalu nadai bup ti bukai. Aku deka magi ngagai dua jenis gerija iya nya Khatolik enggau Protestan, dalam dua jenis tok gerija protestan dikumbai orang orang kristian aja, taja orang Kristian Khatolik dikumbai orang Kristian Khatolik. Kristian Khatoliknya ba sigi agama lalu iya ukai kristian laban doktrin iya lain ari gerija kristian bukai. Taja Kristian Protestan negmbuan mayuh mahzab tang sida bepanggai ba bup kudus siti aja. Lalu dalam gerija mega bisi bida bisi gerija lebih ngajar ngagai chara besembiang ( gerija tradisi) enggau bisi mega gerija lebih ngagai bup kudus ( pelajaran ti leboh nekan penemu Theology @ Krismatik) .Ambik ka banding dalam Gerija Angelican, sida ngajar ngaga tanda regang, cara macha jalai pengarap, cara sembian ari minggu mesti nitih ka atur, tang ba gerija ti Krismatik baka SIB, Baptis, Hope sida leboh nekan ka ngagai pengawa "worship" iya nya belagu nyembah Tuhan enggau belajarka pengawa  Bup Kudus. Ari peda aku , orang Kristian ti ari Kristian Krismatik lebih likun ba pengarap sida iya, nama kebuah? Laban sida mansik jaku Tuhan enggau lebih dalam. Lalu sida ngembuan pengelaman peribadi begulai enggau Tuhan. Sida ngembuan kesaksian tauka cherita pengidup ngasai ka pemisi Tuhan dalam pengidup sda. Baka aku endang adai ari gerija Iban ti krismatik, aku lebih belajar ka pansik dalam bup kudus enggau kristis. Lalu ba sembiang ari minggu pengajar sembiang endang nekan ka ba isi bup kudus ukai ba pengawa tradisi sembiang baka ator sembiang. Bup kudus ukai semina dibacha aja tang diperati ka enggau dalam.  Pulai baru ngagai pasal pengarap, Kristian nya sebenar iya ukai agama tang "personal relationship with God', laban dalam kristian ukai agama nya ti nyelamat ka kitai sereta meri kitai manah ba mua Tuhan tang ari pengerindu Tuhan empu. enti agamanya leboh ngagai ator sembiang enggau pengawa ti salah enggau betul, tang "personal relationship: iya nuan enggau Tuhan empu. Nuan besampi bejaku enggau Iya, nuan ngasai ka pemisi iya.


     Nama tanggungjawab tauka batang pengawa kitai kristian dalam ngetanka Adat Iban? Ba atur pengidup kitai iban mayuh bendar isu ti nagang kitai meretika reti bup kudus nya. Mayuh bendar bagi adat kitai Iban enda sejalai enggau ajar bup kudus. Taja uatai ka dikerandau aku ditu nama enggau bakani kitai kristian nengah isu-isu tok? Ditu aku deka meri kitai berapa tanya ti selalu diberika kitai Iban dalam ngembuan pengarap kristian.


1. Tau enda kitai agi percaya ka negu?- negu nya bepanggai ba nasib, enti enda negu kitai tulah lalu deka takut kena penusah. Taja ba bup kudus madah pengarap kitai dilempai Tuhan aja, nadai utai bukai. Taja enti nuan negu ketegal nuan bebasa ka orang ti meri pemakai nya tang nuan kenyang ( nya budaya ukai worship) taja nuan anang engkah pengadang nuan ba utai empa, tang ba Tuhan.


2. Tau enda kitai ngirup?- Ngirup tau taja ukai sampai mabuk. ambi kebanding Tuhan Jesus nukar ai nyadi anggur enggau timoti ngirup ai anggur ketegal ngangatka perut iya. Nama tuju ngirup? nya kebendar iya ditekan ka Tuhan. enti nuan ngirup ketegal deka muai masalah, ngenatai ka penusah nya ukai ti dimendarkan Tuhan laban nya meyati diri. Ngirup nya mesti bisi bertakat. Ngirup ai ti diberi maya gawai nya endang basa kitai Iban. (TANG) amaran keras tok. Orang Kristian ti enda MATANG dalam iman anang ngirup manah agi laban kita beda nemu bida, tang orang Kristian ti udah ngasai ka diri udah nemu reti silik dalam bup kudus. Takat ngirup nya mesti diberi dalam diri. Ngirupnya budaya kitai Iban? Tang ngagai sida ti enda ngirup enggau ke biak anang belajar ngirup sekali. Tang ngagai ba orang ti diau segulai ba rumah panjai isu tok endang sigi selalu meri sida keliru. Enti enda ngirup sekali nya manah. Tang enti nuan ngirup ketegal basa enggau ngintu pengerami ( tang ukai tekelalu). Muai ai dulu sebedau ngirup nya pengawa besembah.


3. Tau enda kitai bepantang? Bepantang nya budaya tauka fesyen. Tang nitih ka bup kudus nadai ayat ti jelas madah enda tau bepantang. Tang enti bepantang asal Iban nadai salah ba penemu aku, laban nya budaya kitai, tang enti bepantang ketegal bisi kebuah bukai baka gangster, baka bisi penemu jai, bisi gambar antu nya endang enda tau laban nya endang mandang ka saksi manah. Pengidup roh nya lebih beguna ari pengidup Tubuh, nuan enda tau enda nyaga diri ba pengidup. enti ukir Iban ti endang asal nadai salah, tanag nuan enda tau enda nemu reti pantang nya dulu enggai ka bisi ngembuan sangkut paut ba pengawa sembah.


4. Bakani ngintu orang kahwin enggau orang mati? orang kahwin tau diatur ba rumah panjai enda semesti iya ba gerija, taja ba atur kaunseling enggau jalai pengarap Kristian ( bebini siko aja) nya patut ditanka. Ba orang mati mega ba pengawa mai baya, nyabak ka orang mati, muai ulit, ngintu seratus hari? tau diaduka taja ukai baka orang enda ngelala Tuhan, pengawa nya lebih ka ngagai basa. Nama kebuah bakanya laban orang Iban lebih merening ka ngagai basa ngagai orang, sampai ka sida niang pun endang dibasa. Enti pengawa tok dibuai gerija deka disalahka laban muai adai basa . Aku nemu Gerija deka muai tradisi nyembah petara lama tang basa Iban nya tinggi dalam diri sama diri, uji kitai orang gereja merening ari sukut bukai. 


Nyadi orang Kristian ti bebansa Iban enda sama enggau orang putih. Laban kitai Iban endang sigi kering ba adat enggau basa. kitai patut nyembah Tuhan nya enggau buday akitai empu. Agi aku ingat maya da Gerija Iban suba, kami muji Tuhan ngena ajat, tawak, engkerumung. Ari Musik kami nyampurka alat moden baka sida jita nya ngena alat tradisional, lalu bungai ajat kami nyembah Tuhan ( ukai jengkak2 aja baka lagu Hillsong nya iya) taja ngena ajat Iban. ( chunto ti diberi aku nya ari pengelaman aku aja, enti ari sudut Theology enggau Academic bisi bida mimit) Aku nulis tok pan laban deka bekunsi penemu diri lalu baka pengasai aku udah mela ba sidang Iban, nyadi orang Kristian ba rumah panjai. 


lalu mega mayuh tanya ti bukai tau dianjung kita ngagai aku. Ba pengarap Kristian endang nadai ngagang kitai Iban ngintu adat kitai ( kelebih agi ngagai  basa enggau nyaga pengelikun pangan diri) tang anang aja pengawanya ba aut pengawa besembah. Nya udah salah, laban enda nyembah Tuhan siuk aja. As long  pengawa dikerja kitai nya ukai nyembah, nya nadai salah. Kayu ukur kena aku ditu iay " BASA" . Adat nya basa ti besai ti dikembuan kitai Iban. Adat mega paptut berubah nitih ka awak enggau ator menua awak ulih fleksible enggau orang diatu. Kerja ngetan ka semua utai patut diadu ka ngena pendidikan formal enggau enda formal. Uatai bepun enggau ajar apai indai, ari Ketuai Gerija enggau pengawa perintah megai menua. Taja pan pia anang kita nitih ka jakau ajar Ketuai Gerija enggau Ketuai perintah megai menua, laban sida nya bisi kepentingan magang. Utai ti patut dipegai kitanya "BUP KUDUS". 


           Ba aku ti benung nyadi siku Mahasiswa, lalau nama utai ti udah dikerja aku ngetan ka Iban iya nya enggau bekaul manah enggau bala Iban kebukai, meransang sida dalam pengarap, nulung naka ulih enti sida bisi penanggul. Meri diri dalam pengawa mela Tuhan, jaku Iban nya nyadi Identiti aku. kelebih agi lebuh aku bejaku enggau Iban sama Iban. Ba pengawa ngajat aku endang sigi nemu. Kami ditu endang mai pengawa ngajat nyadi ka budaya kitai Iban.


Jaku Pesan: Enti kitai bisi utai tanya, tauka buah runding ti manah tau dikenatai ka enggau nulis. Aku semina ka nguji bekunsi ka pengasai ati aja laban aku balat akun ka bansa diri. Tja meh diatu orang musim orang peresa, aku enda ulih macha bup maya tok, laban nya aku nulis blog tok laban ka merindang diri nulis sereta bejurai ke penemu. Terima kasih Tuhan Merkat.

2 ulasan:

  1. manah endar post nn tu kaban..ba aku, pengarap enggau adat tu patut bc balance ba siku2 iban..

    BalasPadam
  2. sama sama kaban. tau follow blog aku. nama blog dik kaban?

    BalasPadam

Ti dikerinduka