Aku enda bejalai ke diri

Ba Tahun 2016 tok balat bendar penguji nuntong aku ba pengerai, tang ketegal pengasih Tuhan serta ngau kasih karunia ya Aku agi idup sampai ka ari saritu. Aku muji pemanah Tuhan laban udah dua kali ngerai ka aku ari penyakit.

Ba pun tahun pengudah kitai ka nyambut tahun baru 2016, kira ka bulan satu tok tadik, enda memukai aku kena sakit nyamuk tauka denggi ko kitai. Enam ari ba sepital apu naka meh penusah ati enggai ka kena demam denggi bedarah laban nya ulih naban ka nyawa. Puji Tuhan darah aku nyau manah pengudah ditambah ka ai. Aku masuk ka Hospital Betong udah nya meda pengerai aku majak enda manah lalu taban ka orang enggau Ambulan ka GH Kuching. Akai dia meh aku meda ka mayuh amat orang ngenat ka pemedis enggau penyakit. Mujur aku bisi pengarap ka Tuhan, ba dalam ati din sapa enda takut meda mensia nyau ka apus seput. Bisi ga nya nyau mengkakai ngenat ka pemedis diri. Naka meh penusah ati bala kaban belayan ya ka ngibun sida dia. Puji Tuhan, aku bisi bini ku ngibun aku enggau bala sida kami sebilik enggau menyadi ka selalu datai ngundang. Pia mega bala kaban aku bisi mega datai ngabas nanya ka berita. Sekumbang ka masuk dalam hospital nya aku ending besampi minta Tuhan ngerai ka aku, lalu aku bebesai terima kasih ka Tuhan laban udah meri siku indu ka manah amat mela aku. Bini aku semampai kiruh mela aku.

Ba pun bulan lima tok tadi , enda mukai mukai ga pengudah PRN Sarawak, otw pulai ka endur gawa, tak benung driba aku pedis perut muak ka sepiak kanan. Akai naka pemedis , endang sigi nyangka diri empu kena Appendix aku. Puji Tuhan dianjung ka hospital BMC Bintulu lalu malam nya aku discan orang, pagi siti lalu dibedah DR dibuai perut puntul. Pengawa ka muai perut puntul nya mujur magang. Aku sigi besampi ka Tuhan nyerah ka seput nyawa ku idup enggau mati sigi ba ya aja.
Puji Tuhan bala ari entua aku bisi datai enggau entua aku empu bisi ngabas kedung aku sakit maya nya . Bisi lima malam aku ba dia, kakak Jess meh ngibun aku iya nya petunggal aku ari sepiak sida apai.

Naka bisi kitai nginga orang kena denggi parai , orang ke appendix parai kan, tang puji Tuhan aku diberik Tuhan peluang idup. Peluang kitai ka agi idup tok meh kitai patut mulia ka Ya. Enggau ba blog tok meh aku bersaksi ka pemanah Tuhan ba idup ku. Tuhan awak ka nuan semampai nyaga ngemataka aku ari semua serangan Rohani, beri meh aku ti ti tetap rinduka Nuan belama. Ba Nuan meh endur aku ngelempai ka ka semua penusah aku. Ba nuan meh aja endur aku meri semua puji enggau mulia aku. Taja aku siku orang ka bedosa enggau lemik aku datai enggau baru ati ensuruk besugang ba kaki nuan nyembah nuan , Nuan enda kala ninggal ka aku.

Pemanah nuan Tuhan enda kala ninggal ka Aku.